‏مضامین لیبل والی اشاعتیں دکھا رہا ہے۔ سبھی اشاعتیں دکھائیں
‏مضامین لیبل والی اشاعتیں دکھا رہا ہے۔ سبھی اشاعتیں دکھائیں

جمعہ، 3 جنوری، 2014

آلودگی پیما پتنگ

اگر میں آپ سے پوچھوں کہ کبھی آپ کو پتنگ اُڑانے کا اتفاق ہوا ہے تو بہت کم لوگ ہوں گے جن کا جواب 'نہیں' ہو گا۔اور اگر  سوال یوں ہو کہ آپ میں سے کتنے ایسے ہیں جو کسی نہ کسی طرح بھی پتنگ بازی سے منسلک رہے ہیں تو تقریبا سبھی ہاتھ کھڑے ہوں گے۔ کچھ پکّے پتنگ بازوں کے اور کچھ میرے جیسے کَنّی بازوں کے۔ خیر چھوڑئیے جی !ہم تو ہر بسنت میں پتنگ اُڑاتے اور کنّیاں دیتے ہی رہ گئے اوراس شعبے میں بھی بازی لے  گیا ہمارا ہمسائیہ “چین” جو کبھی چین سے بیٹھا ہی نہیں۔ لوگوں کو دن میں بھی تارے نظر آتے ہیں مگر بیجنگ میں رہنے والے ہمارے چینی بھائیوں کو رات میں بھی آسمان پر تارے نظر نہیں آتے۔ جی نہیں! اس کی وجہ یہ نہیں ہے کہ ان کی آنکھیں چھوٹی چھوٹی ہیں بلکہ

جمعرات، 7 مارچ، 2013

کلّاں کی سیر (سفر نامہ)۔


ہم رات ہی کو یہاں پہنچے تھے۔
میں اور میرے دوست
میں اور میرے دوست
آگے چھٹیاں آ رہی تھیں، دوست کا گاؤں یونیورسٹی سے قریب ہی تھا۔ خیال آیا کہ  کیوں نہ دوستوں سے مل کر پروگرام بنایا جائے کہ گاؤں جائیں گے ، رات کا کھانا خود پکائیں گے،رات وہاں گزاریں گے۔ اور صبح سیر سپاٹا کر کے واپس آ جائیں گے۔ جب دوستوں سے  بات کی تو اچھا جواب ملا اور پروگرام طے ہو گیا کہ آدھےگھنٹے میں نکلنا ہے۔
جہاں میں زیرِتعلیم ہوں یہ جگہ اسلام آباد کی حدود میں ہی ہے مگر اکثر اسلام آباد یئے نہیں جانتے ۔ جب میں پہلی جگہ یہاں آیا تھا تو مجھے بھی یقین نہیں آ رہا تھا کہ میں اسلام آباد ہی میں کھڑا ہوں۔  خیر کچھ ضروری سامان

جمعرات، 16 اگست، 2012

شکوہ!

لو جی اقبال کی نظم شکوہ کا شعر حاضر ہے:۔
روزِ حشر میں بے خوف گھس جاؤں گا جنت میں
وہاں سے آئے تھے آدم وہ میرے باپ کا گھر ہے۔
اور جوابِ شکوہ میں اس کا جواب یوں دیا گیا:۔
ان اعمال کے ساتھ تو جنت کا طلب گار کیا ہے؟
وہاں سے نکالے گئے تھے آدم تو تیری اوقات کیا ہے؟
اجی حیران کیوں ہو رہے ہیں؟ کیوں آپ کو یہ شعر اقبال کا نہیں لگتا؟ مجھے بھی نہیں لگتا کیوں کہ بدقسمتی سے میں نے شکوہ اور جوابِ شکوہ پڑھ رکھی ہے۔ پہلے تو میں ذرا ٹھٹکا کہ ہو سکتا ہے کہ میری یادداشت کمزور پڑ گئی ہویا علامہ اقبال کا کوئی نادر ذخیرہ منظرِ عام پر آگیا ہو اور یہ شعر اقبال کا ہی ہو ۔مگر یہ اندازِتکلم اقبال کا تو نہیں !ٍنا ہی وہ شاہین کی خودی کا درس! یہ تو خوامخواہ جنت میں گھسنے کی دھمکی دی جا رہی ہے۔ خیر جس نے مجھے ایس ایم ایس کیا تھا ان سے میں نے ڈرتے ڈرتے شکوہ کیا کہ بھائی مجھے اس شعر کی صحت میں شک ہے۔ کیا آپ کو یقین ہے کہ یہ گستاخی علامہ اقبال نے ہی کی ہے؟ جوابِ شکوہ ملاکہ نہیں جناب یہ کسی اور کا ہے مجھے دوسرے بھی کئی لوگوں نے نشاندہی کی ہے۔
تو حضرت ۔۔۔۔نے اتنی زحمت بھی نہیں کی کہ اگر ان کو علم ہو چکا ہے تو اس غلطی کی اصلاح کر دی جائے۔ یہ کوئی پہلا واقع نہیں ہے۔ ایک مرتبہ پہلے ایک دوست نے میسیج بھیجا کہ اگر فلاں نیک کام کرو گے تو اللہ نے کہا کہ میں اتنی حوریں دوں گا۔ میں نے پوچھا کہ اللہ نے کس جگہ یہ کہا؟ کس سورت یا آیت میں؟ اُلٹا میری درگت بنا ڈالی کہ یار اب میں حافظِ قرآن تھوڑی ہوں۔ مجھے کسی نے میسیج کیا میں نے فارورڈ کر دیا۔
اس کے علاوہ بھی کئی احادیث اور حضرت علی کے اقوال آتے رہتے ہیں جن کو عقل شک کی نگاہ سے دیکھتی ہےمگر اچانک ان ہستیوں کی عظمت کا خیال آتا ہے تو میں وسوسہ سمجھ کر فورا توبہ کر لیتا ہوں کہ اگر واقعی ان کے ہوئے تو؟کہیں سے محمد ﷺ کا فرمان نظر سے گزرا تھا جس کا مفہوم کچھ یوں تھا کہ کسی شخص کے جھوٹا ہونے کے لئے اتنا ہی کافی ہے کہ وہ کوئی بات بلا تصدیق آگے پھیلا دے۔ اس فتنے کا حُسن یہی ہے کہ کرنے والا سمجھ رہا ہوتا ہے کہ وہ تو بہت ہی اعلٰی اور اچھا کام کر رہا ہے۔تبلیغ کر رہا ہے۔ ویسے بھی میرے جیسے آجکل تبلیغ ہی کرتے ہیں اور عمل کا ذمہ دوسروں کے سر۔ اب تو جو بھی کوئی میسیج حدیث والا آتا ہے میں فورا بغیر پڑھے اسے اُڑا دیتا ہوں۔جتنی حدیثوں کا پہلے سے پتہ ہے اگر انہی پر عمل ہو جائے تو بڑی بات ہے۔ کئی کاریگر تو ایسے بھی ہوتے ہیں کہ بڑی محنت سے کوئی بات گھڑی پھر کسی کتاب کا فرضی نام بھی گھڑ لیا اور صفحہ نمبر بھی لکھ دیا کہ اب تو پڑھنے والا مطمئن ہو جائے گا۔ پڑھنے والے بھی دیکھتے ہیں کہ حوالہ دیا ہوا ہے بس اتنا ہی کافی ہے۔ حوالہ صحیح ہو یا غلط اس سے انہیں کیا غرض ؟ اور وہ بھی اس تبلیغ میں شامل ہو جاتے ہیں۔ یوں جھٹ میسج در میسج پھیلتا رہتا ہے۔ سونے پہ سہاگہ ساتھ یہ تلقین بھی کی جاتی ہے کہ زیادہ سے زیادہ لوگوں تک بھیجیں تا کہ آپ کو بھی ثواب ملے۔ خوب گر نکالا ہے ثواب کمانے کا ؟ بس میسیج پیکج کروا لو اور موبائل ثواب کی فیکٹری میں تبدیل۔ اور ژونگ اور یوفون والوں کے وارے نیارے! ان کی سروس چلتی رہتی ہے۔ آخر یہ بھی تو ثواب ہے نا کہ آپ کی
وجہ سے کسی کا پیٹ بھرا رہے۔
ویسے جب بھی میں اوپر والا شعر پڑتا ہوں تو بے اختیار ہنسی آ جاتی ہے۔ “بے خوف گھس جاؤں گا جنت میں” ہاہاہا! اور وہ بھی حشر کے دن؟ بچُو! پتہ چلے گا اس دن جب جُوت پھرے گا(اللہ بچائے)۔

پیر، 9 جولائی، 2012

معافی کا معاوضہ۔۔۔

معافی کا معاوضہ۔۔۔

نیٹو سپلائی بحال ہو چکی ہے اور  نیٹو سامان  پاکستانی سیکیورٹی میں افغانستان جانا شروع ہو چکا ہے۔ قطع نظر اس کے کہ اِن ٹرکوں میں افغانیوں کے  لئے ٹماٹر ہیں یا دوائیاں، امریکیوں کا بحری بیڑہ ہے یا مرغیوں کے انڈے یا پھر افغانیوں کے کفن! میں یہ سوچ رہا ہوں کہ یہ سپلائی بحال کیوں ہوئی؟ آپ  غلط  سمجھ رہے ہیں۔ میں بحالی کے خلاف نہیں ہوں۔ بحال ہونے سے پہلے یہ بند ہوئی تھی۔ میں اُس کے خلاف ہوں کہ یہ بند کیوں کی تھی؟
ایک  وجہ تو یہ ہو سکتی ہے کہ امریکہ میں اس سال ٹماٹر کی پیداوار کم ہو گئی ہو یا دوایئاں مہنگی ہو گئی ہوں یا کسی وجہ سے مرغیوں نے انڈے نہ دیے ہوں اس لئے کچھ ماہ رُکی رہی مگر ہماری حکومت کچھ اور ہی کہتی ہے۔ وہ یہ کہ امریکہ نے پاکستان کی خود مختاری کا احترام نہیں کیا اور سلالہ میں فوجی جوان مارے۔ مگر میں انڈوں اور ٹماٹروں والی بات  کو زیادہ اہمیت دیتا ہوں کیونکہ امریکہ نےپہلے کب ہماری خود مختاری کا احترام کیا ہے؟ اور کیا سلالہ سے پہلے "فرینڈلی فائر" کے بینر تلے پاکستانی فوجی نہیں مرتے رہے خاکم بدہن 'شہید' ہوتے رہے(انما الاعمال باالنیات)۔ نہتے لوگ نہیں شہید ہوتے رہے۔ ڈرون آئے دن پاکستانی  سرحدوں میں جیسے ہمارے دعوت نامے پر آکر خودمختاری کے محبت نامے پھینکتے ہیں!
ایک لمحے کے لئے  ٹماٹر وغیرہ کو بھول جاتے ہیں اور  حکومت کی بات مان لیتے ہیں کہ امریکہ نے عالمی قوانین کی خلاف ورزی کرتے ہوئے پاکستانی سرحد میں آکر فوجی شہید کئے۔میں نے شاید کسی امریکی فلم میں ہی ایک ڈائیلاگ سُنا تھا کہ "قانون تو بنائے ہی توڑنے کے لئے جاتے ہیں"۔ یہ فقرہ امریکہ پر اس حوالے سے جچتا ہے۔
 اس لئےاحتجاجاََ نیٹو سپلائی بند کر دی گئی۔ اور امریکہ سے اس بدمعاشی پر غیر مشروط معافی مانگنے کا مطالبہ کیا گیا۔  اور نیٹو سپلائی کی بحالی کا معاملہ پارلیمانی کمیٹی کے حوالے کر دیا گیا۔ یہ سپلائی تقریباََ سات ماہ بند رہی۔ امریکہ اس دوران بار بار افسوس کا اظہار کرتا رہا اور سیاستدان پھڑیں مارتے رہے کہ افسوس کافی نہیں معافی درکا رہے۔ پتا نہیں کیسے گزرے ہوں گے یہ جدائی کے سات ماہ! تمہیں کیا احساس ان کا؟ کہنے کو اسان ہے مگر گن کر دیکھو پورے 210 دن بنتے ہیں۔
اور اب وزیر خارجہ کے کہنے کے مطابق معافی مانگ لی گئی ہے۔ پتہ نہیں سفارتی اور وزارتی سطح پر اتنی منافقت کیوں ہوتی ہے؟معافی مانگنے کا مطلب یہ ہے کہ امریکہ نے اپنی غلطی تسلیم کر لی۔ مگر جیسے ہی امریکہ نے معافی مانگی  سپلائی بحال کر دی گئی گویا معافی نہ ہو سپلائی کھولنے کا آرڈر آیا ہو۔ اور اپنے ہی کہے کے مطابق پارلیمانی کمیٹی کو نظر انداز کر دیا گیا۔ارے جاہلو ! تم غلطی پر انعامات  دے رہے ہو۔اگر امریکہ نے اپنی غلطی تسلیم کی ہے تو ان سے مطالبہ کرو کہ اُن مجرموں کے خلاف کاروائی کریں جنہوں نے  یہ غلطی سر زد کی ہے۔ جو نیٹو فوجی یا عہدیدار اس میں ملوث تھے امریکہ یا عالمی عدالتوں میں اُن کے خلاف کاروائی کا مطالبہ کرو۔ کبھی ایساہوا ہے کہ کوئی آدمی غلطی تسلیم کرے تو اُسے انعام سے نواز دیا جائے۔ بس  سپلائی کھلنے کے بعد ملنے والی مدد نے تمہاری سوچنے سمجھنے کی صلاحیت سلب کر لی ہے۔ اور ہاں امریکہ کا  جنگی بحری بیڑا جو گوادرسے شاید مچھلیاں پکڑنے آیا تھا وہ بھی واپس جا رہا ہے(میں نے اندازہ لگایا ہے کہ مچھلیاں پکڑنے آیا تھا کیونکہ کسی نیوز چینل نے اس کی موجودگی کی خبر نہیں دی اور فوج سمیت کسی سرکاری ادارے نے اس کی وضاحت نہیں کی تو کسی چھوٹے موٹے کام سے ہی آیا ہو گا)۔

 واہ بھئی واہ! جمہوریت کہتے ہو نا! ریفرنڈم کروا لیا ہوتا۔  جن شہیدوں کا نام لے کر تم نے سپلائی بحال کی تھی ہمیں ان کی ماؤں کا موقف سُناؤ۔ پو چھو اُن سے کہ کیا رائے ہے اُن کی تمہارے اس فیصلے کے بارے میں۔ اگر ان شہیدوں کی مائیں کہہ دیں تو پھر بھی ٹھیک! تم کہو گے کہ ملکوں کی پالیسیاں مائیں مرتب نہیں کرتیں تو کسی بھی پڑھے لکھے پالیسی ساز سے پوچھ لکر دیکھو کہ خارجہ پالیسی میں ہمسائیوں کی کیا اہمیت ہوتی ہے۔
 وزیر خارجہ ! ہمسائیوں سے تعلقات خراب کرتی ہو ۔ کل  تم بھی چلی جاؤ گی امریکہ بھی چلا جائے گا۔ ہم اپنے ہمسائے کو کیا منہ دکھائیں گے۔کن بنیادوں پر ان سے تعلقات استوار کریں گے؟

بدھ، 27 جون، 2012

کتابیں وہ اپنے آباء کی۔۔۔

کتابیں وہ اپنے آباء کی۔۔۔
آج میں نے اپنی گلی میں ہی اُسے پا لیا۔ میرے کچھ بولنے سے پہلے ہی وہ مجھ سے مخاطب ہوا۔
"کیا حال ہے چوہدری صاحب؟"
اُس کے منہ سے چوہدری سُن کر مجھے چنداں حیرت نہ ہوئی کیونکہ میں جانتا تھا کہ اسے معلوم ہو چکا ہے کہ میں اُسے کچھ بیچنا چاہتا ہوں۔ ویسے بھی میں نے سن رکھا ہے کہ لوگ توضرورت کے وقت گدھے کو بھی باپ بنا لیتے ہیں۔
"اللہ کا شکر ہے بھائی جان! ردی کا کیا ریٹ چل رہا ہے آجکل؟"
میں نے سیدھی کام کی بات کی۔
"کتابوں کی 12 روپے اور اخباروں کی 20 روپے"
میں سوچنے لگا کہ لوگوں کی نظر میں کتابوں کی بس اتنی ہی اہمیت ہے کہ ذرا پرانی ہو جائیں تو وزن کے لحاظ سے انہیں خریدا جاتا ہے۔وہ کتابیں جن کو پڑھ کر میرے خاندان کے بیسیوں لوگ آج اچھے عُہدوں پر فائز ہیں۔ وہ کتابیں جو انسان کو ایک گاؤں سے نکال کر کسی بڑے شہر کے دفتر کی کرسی پر لے جاتی ہیں، جو شیدے کو رشید صاحب بنادیتی ہیں اور انسان کو انسانیت سکھاتی ہیں، جن میں صدیوں کی سائنسی تحقیق کا نچوڑ، انسانوں اور معاشروں کے تجربات و نظریات کاخلاصہ ہوتا ہےفقط 12 روپے کلو! واہ رے بھائی صاحب کیا قیمت لگائی آپ نے؟ اور اخباریں جن میں آدھا وزن سیاستدانوں کی تُوتُو میں میں، اشتہاروں ،فلمی بدکاروں کے مشاغل اور کالم نگار اداکاروں کی تحریروں کا ہوتا ہے۔ اِن کی قیمت کتابوں کے ڈیڑھ گُنا سے بھی زیادہ۔
"جی باؤ جی! اندازا کتنی کتابیں ہوں گی؟"
میں چوہدری سے باؤجی کا سفر طے کر چُکا تھا۔
"کتابیں تو کافی ہیں"
"پندرہ کلو ہوں گی؟"
"ہاں اتنی تو ہوں گی"
میں اِن بیش قیمت اور انمول کتابوں کو یوں فقط 12 روپے کلو کے حساب سے نہیں بیچنا چاہتا تھا۔
"بھائی آپ کل آئیں گے ناں۔کل آکر لے جانا تب تک میں نکال کر رکھ لوں گا"
"کوئی بات نی باؤجی آپ تسلی سے نکال لیں میں یہیں بیٹھ کر انتظار کر لیتا ہوں"
"لیکن کتابیں ادھر اُدھر بکھری ہوئی ہیں اکٹھی کرنا پڑیں گی"
"چلیں میں آگے سے گیڑا(چکر) لگا آؤں ۔ ایک گھنٹے تک آ جاؤں گا تب تک آپ چھانٹی کر لیں"  گویا اُس نے مجھے مزید بےوقوف بناتے ہوئے کہا۔
 "ٹھیک ہے"  اور میں بےوقوف بن چُکا تھا۔
میں سیدھا اسٹور نما اُس کمرے میں پہ پہنچا جہاں کتابوں کا انبار لگا ہوا تھا۔ میں نیچے بیٹھ گیا اور ایک ایک کر کے کتابیں کنگھالنے لگا۔
ہر قسم کی کتابیں تھیں؛ قانون کی کتابیں،انگریزی ادب  اور فلسفہ، شاہکار انگریزی ناول، بیس پچیس سال قبل کی بی-اے ،ایم-اے اور بی-ایس سی کی نصابی کتابیں، ٹریگنومیٹری، الجبرا،سائنس، فلسفہ اور نجانے کیا کیا۔ مگر اِن کتابوں کی بد قسمتی کہ یہ کسی لائبریری کے بجائے میرے گھر کے سٹور میں پڑیں تھیں۔
اصل میں یہ ہمارا خاندانی آبائی گھر ہے۔ہمارے والد سے پہلے یہاں ہمارے دادا اپنے کنبے کے ہمراہ رہائش پذیر تھے اور ان سے پہلے اُن کے والد اور دادا۔ہمارے خاندان اور رشتہ داروں میں جو بھی تعلیم حاصل  کرتا وہ فارغ التحصیل ہو کر اپنی نصابی اور غیر نصابی کُتب یہیں چھوڑ جاتا۔ اسی طرح کرتے کراتےمیرے دادا کی وفات کے بعد جب میرے والد اور اُن کے بھائیوں کو ایک دوسرے پر اعتبار نہ رہا اور انہوں نے دادا کی چھوڑی ہوئی جائیداد آپس میں تقسیم کرنے کا فیصلہ کیا تو یہ آبائی گھر میرے والد کے حصے میں آ گیا اور اِس کے ساتھ ہی یہ کتابوں کی دولت بھی۔یہ کتابیں کم از کم پچھلے 20 سال سے کسی کونے میں پڑیں تھیں ۔3 سال پہلے جب گھر کےسامان کو اِدھر اُدھر کیا تو برآمد ہو ئیں۔ تب سے یہ ہمارے لئے دردِسر بنی ہوئی ہیں کہ اِن بیش قیمت کتابوں کا کیا کریں۔ اِن میں سے اکثر کتابیں میری دادی مرحوم کے بھائی کی ہیں جو کہ اپنے زمانے میں جھنگ کے جانے مانے اور اعلٰی پائے کے وکیل ہونے کے ساتھ ساتھ ادبی ذوق بھی رکھتے تھے۔میں نے اپنے بڑوں سے سُنا ہے کہ جب وہ اپنے زمانے میں وکالت کرتے تھے تو اُس وقت پورے جھنگ شہر میں صرف تین کاریں ہوا کرتی تھیں جن میں سے ایک اُن کی تھی۔اُن کی اکثر کتابیں کسی نہ کسی طرح ہمارے گھر پہنچ گئیں۔
میں ایک ایک کر کے کتابوں کو دیکھتا رہا۔ کچھ تو دیمک کی بھینٹ چڑھ چکی تھیں اور بالکل ناکارہ ہو چکی تھیں۔کچھ خراب ہونے کو تھیں اور کچھ اندر سے بالکل نئی نویلی تھیں مگر اِن کی جِلدیں خاک آلود اور بوسیدہ ہو چکی تھیں۔ ان میں میرے چچا زادوں(جو اب بر سرِروزگار اور سربرہِ خاندان ہیں)کی زمانہء طالبعلمی کی کتب بھی تھیں اور ان پر اُن کے ذوقِ مصوری کے آثار بھی موجود تھے۔
اچانک ایک کتاب پر میں اپنے والد کا نام پڑھ کر رُک گیا۔یہ ان کے زمانہءطالبعلمی کی کیمسٹری(بی-ایس سی آنرز) کی کتاب تھی۔ میں نے اِس کتاب کی طائرانہ ورق گردانی کی تو مجھے اِس میں سے ایک رسید ملی جس پر اِس کتاب کی قیمت درج تھی۔ میں پڑھ کر حیران ہو گیااور شاید آپ بھی ہو جائیں!اُس کتاب کی قیمت فقط پندرہ روپے تھی حالانکہ وہ لندن کے ایک انٹرنیشنل پریس کی چھپی ہوئی تھی۔میں نے وہ اپنے والد کو بھی دکھائی۔اگر آج اُس معیار کی کتاب خریدی جائے تو 1500 سے کم تو بالکل نہ ملے گی۔اور تھوڑی دیر پہلے مجھے ایک خریدار اِس کی قیمت 12 روپے کلو کے حساب سے بتا رہا تھا۔
خیر کافی سوچ بچار کے بعد میں نے اپنے بہن بھائیوں کی پرانی نصابی کتابیں جو اب کسی کام کی نہ تھیں انہیں اپنے آباءو اجداد کی دیمک زدہ کتابوں کے ساتھ شامل کر دیا۔ اور اسی طرح کنگھالتے کنگھالتےمیں نے کئی اور کتابیں بھی جو کہ کسی نصاب کا حصہ تھیں(سوائے اسلامیات کے) اور ہمارے مزید کسی کام نہ آسکتی تھیں اِن کو بھی ساتھ ملا دیا۔البتہ میں نے عمرانیات،انگریزی فلسفہ،ناول اور دوسری کئی مفید قسم کی کتابوں کو محفوظ کر لیا۔
ٹھیک ایک گھنٹےبعد وہ ردی والا آیا تو کتابوں کا وزن کیا گیا۔کُل ملا کر 20 کلو ہوا۔ اُس نے میرے ہاتھ میں 240 روپے تھما دئے۔ اور میں بوجھل قدموں کے ساتھ گھر واپس آگیا۔ اِس موقع پر نجانے کیوں مجھے اقبال کا وہ شعر یاد آ گیا:
مگر وہ علم کے موتی ، کتابیں اپنے آباءکی
جو دیکھیں ان کو یورپ میں تو دل ہوتا ہے سیپارہ
مگر میرے آباء کے موتیوں میں سے جو سب سے زیادہ قیمتی تھے ابھی بھی میرے گھر کے سٹور میں محفوظ ہیں۔

بدھ، 20 جون، 2012

ہمارا معاشی نظام!

جب اپنے برِصغیر پر انگریز قابض تھے تو کہتے ہیں کہ اس دور میں مسلمانوں کی حالتِ زار بہت ہی قابلِ رحم تھی کیونکہ ان کی مذہبی اقدار خطرے میں تھیں،ان کو متعصب پالیسیوں کے ذریعے اور جائیدادوں سے محروم کر کے معاشی طور پر اپاہج کر دیا گیا تھا، نوکریوں کے دروازے بند تھے اور تعلیم میں بھی مسلمان ہندؤں سے بہت پیچھے رہ گئے تھے یہاں تک کہ مسلمانوں کی آنکھیں سید احمد خان،محمد اقبال اور محمد علی جناح جیسے اور بہت سے دوسرے لوگوں نے کھولیں۔ ویسے میں ذاتی طور پرآج پاکستان میں بسنے والوں کو اُن سے زیادہ قابلِ رحم سمجھتا ہوں کیونکہ اُن کے ساتھ یہ سب غیروں نے کیا تھا مگر اِن لوگوں کے ساتھ اپنے کر رہے ہیں۔خیر بات بہت لمبی ہو جائے گی
جب مسلمانوں کو اُس ملے جلے ماحول میں کام بنتا نظر نہ آیا اور انہوں نےاپنا جداگانہ تشخص برقرار رکھنے کے لئے ایک الگ وطن کی تگ و دو میں ہی عافیت جانی تاکہ اپنی دینی تعلیمات کے مطابق اپنی زندگیوں کو بسر کرسکیں۔ کہنے اور سننے کو تو یہ کام بہت آسان تھا مگر کرنے کو بہت کٹھن! اور اُس وقت تحریکِ پاکستان کے رہنما اس پُر خطر راستے سے مکمل طور پر آگاہ تھے اور وہ وقتا فوقتا لوگوں سے اِس کا ذکر بھی کرتے رہے۔ذرا سوچئے کتنا مشکل کام تھا ایک جغرافیائی خطہ حاصل کرنا، پھراس کے لئے ایک آئین بنانا جو کہ اسلامی اصولوں کی ترجمانی کرتا ہو، ایک معاشی نظام تشکیل دینا جس کی بنیاد اسلام کے فراہم کردہ ضابطہ اخلاق پر ہو اور اس کے  علاوہ بھی بہت کچھ۔ اگر اُن لوگوں کی جگہ آج کے رہنما ہوتے تو یہ کبھی ممکن نہ ہوتا کیونکہ ہم میں تو ایک ڈیم بنانے کی ہمت نہیں باقی چیزیں تو بعد کی بات ہے۔جغرافیے اور آئین پر پھر کبھی بات کریں گے۔ اب اپنی توجہ مرکوز کر لیجئے معاشی نظام کی طرف۔
جی ہاں جہاں بانیا      ن ِپاکستان کو نئے ملک کے آئین کے بارے میں واضح نقطہ نظر رکھتے تھے اسی طرح وہ ایک نئے معاشی نظام کی بھی اشد ضرورت محسوس کر رہے تھے۔ایک ایسا معاشی نظام جو کہ اسلام کی ہدایات کے مطابق ہو اور متوازن ہو اور مغربی طرز کا نہ ہو۔ قائدِاعظم نے اس کی وضا حت کرتے ہوئے کہا تھا:
"مغربی دنیا صنعتی قابلیت اور مشینوں کی دولت کے زبردست فوائد رکھنے کے باوجود انسانی تاریخ کے بد ترین باطنی بحران میں مبتلا ہےاگر ہم نے مغرب کا معاشی نظام اپنایا تو ہمیں اپنے عوام کے لئے خوشحالی حاصل کرنے میں مشکلات در پیش ہوں گی۔ ہمیں اپنی تقدیر اپنے علیحدہ اور منفرد انداز میں بنانی پڑے گی۔ ہمیں دنیا کے سامنے ایک ایسا معاشی نظام پیش کرنا ہو گا جو انسانی مساوات اور معاشرتی انصاف کے سچے اسلامی اصولوں پر قائم ہو۔"
قائدِ اعظم کس قسم کے معاشی نظام کی تخلیق کی بات کر رہے تھے اور اُس سے کیا فوائد ہونا تھے؟ ہم کونسا معاشی نظام اختیار کئے ہوئے ہیں اور اس کے نقصانات کیا ہیں؟کیا یہ ہمارے ملی تقاضے پورےکرتا ہے؟

 

ہفتہ، 12 مئی، 2012

آزادی---صرف نعمت؟؟
 "میں آزاد ہوں" یہ پڑھ کر آپ کے ذہن میں کیا خیال آتا ہے-ذرا ایک منٹ توقف کیجئے اور سوچئے کہ آزادی کیا ہے۔ بہت سے لوگ کہتے ہیں کہ آزادی ایک نعمت ہے۔ میں ان کی بات کی تردید نہیں کرتا مگر کیا آزادی صرف ایک نعمت ہے؟ یا ہم سے کوئی تقاضا بھی کرتی ہے؟
    جی ہاں! آزادی ہم سے کچھ تقاضا بھی کرتی ہے۔ بلکہ آزادی کیا خدا کی دی گئی ہر نعمت ہر لحظہ ہم سے کچھ نہ کچھ تقاضا ضرور کرتی ہے۔ اولاد ایک بہت بڑی نعمت ہے مگر تقاضا کرتی ہے کہ اس کی پرورش صحیح خطوط پر کی جائے۔ اسی طرح مال بھی ایک نعمت ہے اور تقاضا کرتا ہے کہ ضرورت سے زیادہ خرچ نہ کیا جائے بلکہ غریبوں، بے بسوں اور محتاجوں کا خیال بھی رکھا جائے۔  مال اور اولاد کے بارے میں اللہ تعالی قران میں فرماتے ہیں کہ تمہارا مال اور اولاد تمہارے لئے آزمائش ہیں۔ اور آزادی کی نعمت ہم سے تقاضا کرتی ہے احساسِ ذمہ داری کا۔
   اس کی ایک موٹی سی مثال یہ ہے کہ بچہ جب چھوٹا ہوتا ہے تو اس کی دیکھ بھال اس کی والدین کے سپرد ہوتی ہے۔والدین کی مرضی کے بغیر وہ من مانی نہیں کر سکتا۔اسی لئے بچہ اگر کوئی غلط عادت اپنا لے تو والدین کوہی موردِ الزام ٹھہرایا جاتا ہے۔ مگر جب یہی بچہ بڑا ہوتا ہے اور بعض معاملات میں خودمختار اور آزاد ہو جاتا ہے تو وہ اپنے نفع و نقصان اور کئے کرائے کا ذمہ دار خود ہوتا ہے، اسی لئے اسے بہت پھونک پھونک کر قدم اٹھانا پڑتے ہیں مبادا کوئی غلطی سرزد نہ ہو۔
 اسی طرح جب کوئی قوم آزاد ہوتی ہے تو بالکل اُس بالغ بچے کی طرح اپنے نفع و نقصان کی ذمہ دار وہ خود ہی ہوتی ہے۔ اپنی پسپائی، شکست اور ناکامی کا ذمہ دار کسی اور کو ٹھرانا اُسے زیب نہیں دیتا حتیٰ کہ اپنے دشمن کو بھی نہیں(بھئی دشمن ہوتے کس لئے ہیں)۔
  یہ تو تھی ذمہ دار قوموں کی بات، اب اپنا عکس دیکھئے۔ ہم میں سے اکثر آزادی کو صرف نعمت سمجھ کر اس کے مزے لُوٹنے میں مصروف ہیں اور اپنی ذمہ داریوں سے بالکل بے بہرہ ہیں۔ جب توازن بگڑتا ہے اور کوئی بحران آتا ہے تو بڑی دلیری سے قوم اپنے  حکمرانوں اور حکمران ازلی دشمنوں کو موردِالزام ٹھہرانا اور کوسسنا شروع کر دیتے ہیں حالانکہ ہم میں سے ہر فرد ذمہ دار ہے۔ اور شاید ہمارے بحرانوں کی وجہ بھی یہی ہے کہ قیامِ پاکستان سے ہی ہم نے آزادی کی نعمت کا بھی وہی حشر کیا جوہم دوسری نعمتوں کا کرتے ہیں ۔اپنی ذمہ داریوں سے غفلت برتی۔ نہ اپنے نظام کو نظریہ کے مطابق ڈھالا، نہ ترقی کی راہ میں رکاوٹیں ختم کیں، نہ مساوات اپنا سکے اور نہ اپنے ذہنوں کو آزاد کر سکے۔ اور نتیجہ یہ نکلا کہ شاید ہم اپنی تاریخ کی سب سے بڑی جنگ ہار رہے ہیں۔ میں  1948 کی جنگ کی بات نہیں کر رہا نہ ہی 1965،1971 اور 1999 کی جنگ کی۔ میری مراد شدت پسندی کے خلاف جنگ بھی نہیں بلکہ میں اُس جنگ کی بات کر رہا ہوں جس کا اعلان قائد اعظم نے پاکستان بننے کے ٖفوراؑ بعد کر دیا تھا۔
        "ہماری جنگ ابھی ختم نہیں ہوئی بلکہ یہ تو ابھی شروع ہوئی ہے"
 جی ہان یہ تھی احساسِ ذمہ داری کی جنگ--------ایک عظیم نعمت حاصل کرنے کے بعد!!